નિદ્રાધીન વૃધ્ધ દંપતી પર હુમલો કરી લૂંટ

  • નિદ્રાધીન વૃધ્ધ દંપતી પર હુમલો કરી લૂંટ

ભાવનગર, તા.15
તળાજાના ઘાટરવાળા ગામની સીમમાં વાડીએ સુતેલ વૃદ્વ દંપતિ પર લૂંટના ઇરાદે હુમલો થતા પતિ પત્ની બંનેને ગંભીર હાલતમાં ભાવનગર ખસેડાયા હતા. વૃદ્વના બંને પગ ભાંગી નાખી કાન કાપી નાખ્યો હતો. તો વૃધ્ધાને માથામાં ઘા મારતા બ્રેઇન હેમરેજ થયાનું જાણવા મળ્યુ હતું.
તળાજાાના ઘાટરવાળા ગામની સિમમાં આવેલ વાડીમાં રહી ખેતી કામ કરતા એકલા જ રહેતા વૃદ્વ ખેડૂત દંપતિ ગત રાત્રે વાડીમાં બનાવેલ મકાનના ઢાળીયામાં સુતા હતા ત્યારે અજાણ્યા શખ્સોએ લૂંટના ઇરાદે બંને પર હુમલો કરી ગંભીર ઇજા પહોંચાડી છે. બંનેને ભાવનગર સારવાર અર્થે ખસેડવામાં આવેલ છે.
ચકચારી બનાવ અનુસંધાને તળાજા રેફરેલ હોસ્પિટલ પરથી મળતી પ્રાથમિક વિગતો અનુસાર નજીકના ઘાટરવાળા ગામની સીમમાં આવેલ વાડીમાં ખેતી કામ કરતા માધવજીભાઇ કાશીરામભાઇ પનોત (ઉ.વ.65) તથા શનતુંબેન માધવજીભાઇ પનોત (ઉ.વ.60) બંને પતિ પત્ની વાડીમાં બનાવેલ મકાનના ઢાળીયામાં સુતા હતા.
આશરે રાત્રે 2 વાગ્યા બાદ બંને પતિ પત્નીને બાંધી મોઢા ઉપર ગોદડાં જેવું ઢાંકી બોથડ અને તીક્ષ્ણ હથિયાર વડે અજાણ્યા શખ્સોએ હુમલો કરતા હુમલામાં વૃદ્વ ખેડૂતનાં કાન કાપી નાખવામાં આવેલો. બંને પગ ભાંગી નાખવામાં આવેલા સાથે માથાના ભાગે પણ ઇજા કરેલ હતી.
જ્યારે વૃધ્ધાને માથાના ભાગે ગંભીર ઇજા થયેલ. બંનેને પાડોશમાં વાડીઓ ધરાવતા લોકોને સવારે 7 વાગ્યે ખબર પડતાં. તળાજા રેફરેલ હોસ્પિટલ ખાતે ખસેડવામાં આવેલ હતાં. જ્યાં વૃધ્ધાને બ્રેઇન હેમરેજ હોવાનું જણાવ્યું હતું. બંનેની હાલત નાજુક હોય વધુ સારવાર માટે ભાવનગર ખસેડવામાં આવેલ છે. બાજુમાં વાડીઓ ધરાવનાર ખેડૂતોના જણાવ્યા પ્રમાણે લૂંટારુઓએ ઘટનાને અંજામ આપેલ છે. તળાજા પી.એસ.આઇ. મકવાણા ઘાટરવાળા સ્થળ પર દોડી ગયેલ છે.