જમ્મુ-કાશ્મીરમાં સેનાનો જવાન આતંકી સંગઠન હિઝબૂલમાં સામેલ?

  • જમ્મુ-કાશ્મીરમાં સેનાનો જવાન  આતંકી સંગઠન હિઝબૂલમાં સામેલ?

જવાન છેલ્લા કેટલાય દિવસથી ગુમ : બે સ્થાનિક લોકો પણ આતંકી સંગઠન હિઝબૂલમાં જોડાયા?
શ્રીનગર તા,17
દક્ષિણ કાશ્મીરમાં આ મહિનાની શરૂઆતમાં ગુમ થયેલો સેનાનો એક જવાન આતંકવાદી સંગઠન હિજબુલ મુજાહિદ્દીનમાં સામેલ થઈ ગયો છે. પોલીસ અધિકારીઓએ સોમવારે જણાવ્યું કે, ગુમ જવાન સેનાની જમ્મુ-કાશ્મીર લાઈટ ઈન્ફન્ટ્રીમાં પોસ્ટેડ હતો. તે આતંકવાદી સંગઠનમાં સામેલ થઈ ગયો હોવાની જાણ રવિવારે થઈ છે.
જણાવાઈ રહ્યું છે કે, રવિવારે જ તેણે આતંકવાદી સંગઠન જોઈન કર્યું છે. પોલીસ અધિકારીઓએ જણાવ્યું કે, મીર આ મહિનાની શરૂઆતમાં શોપિયાંથી ગુમ થયો હતો. તે બે સ્થાનિક લોકોની સાથે આતંકવાદી સંગઠનમાં સામેલ થયો છે. એ બે લોકો પણ ગુમ હતા.
જોકે, સેનાએ આવી કોઈ જાણકારી હોવાનો સ્પષ્ટ ઈનકાર કર્યો છે. સેનાએ આ મામલે કહ્યું કે, તે જવાન હજુ પણ ગુમ છે અને કોઈ આતંકવાદી સંગઠનમાં તેના સામેલ હોવાની કોઈ પુષ્ટિ થઈ નથી. બીજી તરફ જમ્મુ-કાશ્મીર પોલીસનું કહેવું છે કે, મીર ઝારખંડમાં તૈનાત હતો અને તેને લઈને તે ખુશ ન હતો.
આ વર્ષે જાન્યુઆરીમાં અલીગઢ મુસ્લિમ યુનિવર્સિટીનો પીએચડીનો વિદ્યાર્થી મન્નાન વાની પણ આતંકવાદી સંગઠન હિજબુલ મુજાહિદ્દીનમાં સામેલ થયાના અહેવાલ બહાર આવ્યા હતા. વાનીની તપાસમાં યુપી પોલીસે યુનિવર્સિટીમાં દરોડો પાડ્યો હતો. આરોપી વિદ્યાર્થીના રૂમને સીલ કરી દેવાયો છે. યુનિવર્સિટી તંત્રએ શંકાના આધારે વાનીને તાત્કાલિક પ્રભાવથી સસ્પેન્ડ પણ કરી દીધો હતો.
તેની સાથે જ હોસ્ટેલના રૂમમાં રહેતો અન્ય એક વિદ્યાર્થી મુજમ્મિલ પણ ઘણા મહિનાથી ગુમ છે. હોસ્ટેલના મેસમાં મન્નાનને છેલ્લી વખત બે જાન્યુઆરીએ જોવામાં આવ્યો હતો. વાનીની એકે-47 રાઈફલ સાથે એક તસવીર પણ સોશયલ મીડિયામાં વાઈરલ થઈ હતી, જેમાં લખ્યું હતું કે, તેણે 5 જાન્યુઆરીએ હિજબુલ જોઈન કરી લીધું. જમ્મુ-કાશ્મીર પોલીસના સુત્રો મુજબ, વાનીના પિતાનું નામ બશીર અહમદ વાની છે અને તે જમ્મુ-કાશ્મીરના કુપવાડા જિલ્લાના તાકિપોરા ગામમાં રહે છે. એક પોલીસ અધિકારી મુજબ, મન્નાન છેલ્લા પાંચ વર્ષથી એએમયુમાં અભ્યાસ કરી રહ્યો હતો. તે એમફીલ કરી રહ્યો હતો. તે યુનિવર્સિટીથી ઘરે નથી આવ્યો.